CHamoru Language Competition

Poetry Recitation

CHamoru Language Competition


Poetry Recitation / Rinisadan Po'ema

Pinadesi, CHinátsaga, Hinemlo’ yan Pås
Tinige’ Rosa Salas Palomo
Fibreru 2021 

Pinadesi, CHinátsaga, Hinemlo’ yan Pås.
Tinituhon gi i dos mit bente gi i Måtso i hinatmen i peste Covid-19 gi i tano’-ta.
Despåsiónñaihon i minalångu yan finatai gi i manlátaftaf na mes siha.
Despues di i tiempon somnak mampos ha tåtme hit ya meggai na minalångu yan finatai.
Ogga’an, talo’åni, puengi, tátalo’ puengi, yan chatangmak.
I Pinadesi
Ta padédesi i peste Covid-19 nu atdet yan tåya’ åmte-ña.
Tåya ha eskókohi – parehu manåmko’, manhoben, manmalångu yan mambråbu.
Ta pongle hit gi i gimå’-ta, ta bossat i pachot-ta yan gui’eng-ta, yan sesso ta fa’gåsi i kannai-ta.
Manmapribini hit na u ta fanábista yan todu i tiempo ta fansais pie na destånsia.
I etmǻs na’piniti na pinadesi i ti sumiña hit bumisita i malangu-ta yan humåfot i matai-ta.
I CHinátsaga
Manmahuchom i eskuela, fañe’cho’an, guma’ Yu’os, gubietnamento, yan tenda siha.
Ya ti u fanmababa astaki tumungokñaihon i minalångu yan finatai ginen i peste.
Ya annai mababa i tenda yan bångko siha ná’manman sa’ gof anåkko’ na fila.
Manmalingu cho’cho’ palu gi i taotao-ta yan kontodu palu i liheng-ñiha,
Tåya’ cho’cho’, tåya’ salåppe’, tumåya’ñaihon lokkue’ liheng yan néngkanno’ siha.
I Hinemlo’
Mañǻsaonao médiku, emfetmera, mamfáfa’che’cho’ espitǻt, polisiha, sendålu yan taotao kimason, I Méggagai na taotao
manná’huyong bossat, makloråksi na saosao, yan hånom atkahót.
Motmot na minalångu gi i dos espitǻt ya ti numahong kåtre yan måkinan humågong.
Mansen yåfai i maná’amte siha – ti nahong kånnai lao sigi ha’ mo’na kada ora yan diha
Astaki dumespåsiónñaihon i minalångu yan finatai yan manmabakuna i taotao siha.
I Pås
CHinachálåni este nu i manmababan i gima’ Yu’os para u ta fanhosme misa.
Manmababa lámeggai na bisnes, setbision gubietnamento, tenda, yan eskuela,
Manungokñaihon i minalångu yan finatai yan lumibrenñaihon i dos espitǻt-ta.
Guaha inayudan néngkanno’, salåppe’, ginima’, yan Covid-19 testing,
Sen sinague lokkue’ nu i ma’apreban finatto, yan binakunan Covid-19.
Pinadesi, CHinátsaga, Hinemlo’ yan Pås.
Hunggan, magåhet, gof makkat i maloffan na såkkan bente bente
Lao, komu taiguihi yanggen mampinakyo hit atdet pat ha fåna’ hit håfa na ira,
Siempre manmanǻyuyot, manmanosge, manmesngon, yan maná’ayuda.
Sa’ metgot i tinangå-ta yan hinengge-ta gi as Saina-ta na u funas i Covid-19!
 

Po’ema/Poetry Recitation PDF (downloadable)
Inachá’igen Fino’ CHamoru Po'ema 2021